Tawargit n Martin Luther King tlkn*!
Écrit par Mohammed Akunad
Is ufan imazighn ad syafutn g trmiwin n wiyad? Is ur ufin ad ttwargan awd nttni tiwargiwin zilnin? Is ur irwas waddad (situation) lli g llan ass ad addad n isggann g marikan n zikk?Gr ifassn nnun(t) asughl n yan umagrad iga mad tzrram, mac s tittawin n uswingm… Zdat n tsdimrawin (soixantaines) n tasut ad izrin, ikka tt inn da ittyara xf isuttca (restaurants) lli s ar ttidun umliln n Marikan: “ansa ad ittuwgdal xf isggann, d udayn, d idan”. Ikk tt inn umarikan asggan, illa fllas ad iffal asgawr ns (sa place) g ttubis i umlil.
G usggas 1955 tugi yat tmirikanit tasggant qqarn as Ruza Barks, ad tfl asgawr ns, tini: “Rmigh g wanaw ad n uzdam!”. Tamahalt (courageuse) ad n tsdnan (timgharin) ad d isnusin amussu n izrfan ighrmann (droits civils) g Marikan, yamz fllas g tgira umghnas duktur Matrin Luther King.
G 28 ghuct g usggas 1963 izzri umghnas axatar Martin Luther King inaw ns (son discours) asrtan “Dari yat twargit” g dat n igdudn n umussu ns g Wacinton lli igan tazuznt (capitale) n Marikan, inna gis: “Tamurt ad ur ad tsiya ar d yamz ufgan asggan izrfan ns inamurn s timmad nsn". G tizi ann nit ismmtr (conseiller) imdfarn ns ad ur urrin s uzuccl (violence) mk nna hlli iga wanaw ns.
Amghnas ad lli mmi tfka tussna ns immuzzan (large) ad issn mamk s ar ttidunt tghawsiwin, issn is ur yallfus (il n’est pas possible) ad yili usdrf (libération) n isggann igh d zwar ur iduy unuga (conscience) n tugtt n umliln, isawl yini: “Tugtt n aytmatngh umliln ussan ad, ssnn is d artum nsn (leur destin) izdi d urtum ngh, d tlilli nsn ur tngara d tingh, mac tawargit ad ur ad tili, igh ur tlli tghnsa (militantisme) n isggann i ixfawn nsn, ur izmr yan ad issudu xf tdawt nk, igh as yad ur tknit...”.
Isrs Martin Luther King timatarin n ubrid i tghnsa n tmdrusin; iga t ubrid war azuccl, abrid n twisi xf aylli ismunn tamdrust d tugtt, d ad mmaghn ad d sduyn anuga ns anamur d unfgan (humanitaire) d ubrid n uzubdu n tghnsa, d usdus ns.
Mac aylli isugrn attas g tbrat ns iga t llig inna: “Ajjat agh ad ur nzdgh g talat n trsant (désespoir)”. Mac igh nzra tamurt ak, hat tililli d tghdmt d tdimukrasit ad igan abrid awlawal n usdrf n ufgan, d tuska n yat tmurt ilan azrkki (respect) inna: “Ajjat tililli ad ttirir, tg ilmma Marikan yat tmttint n tidt.”
G 14 n abril 1968 ingha yan ufus anabkad (assassin) Martin Lutr King, mac taghnsa ns d iman ns d twuri ns d tuwargit ns ur mmutn.
G usggas 1964 usan d izrfan ighrmann lli xf immagh Martin Lutr King, g tgira n kkuzt tmrawin n isggasn, jjin waggasn n Marikan, tssnti ar tjji g wattann ns (ses maux) lli igan win umzruy, irz Barak Ubama imggura n tsiwagh tiqqburin.
G usggas 2005 tafud Ruza Barks lli izzrin g tudrt ns 92 n isggasn, inzd (donner l’ordre) uslway n marikan Bush amzyan ad grawlnt tcnyalin (drapeaux), ig mk ann tamatart n ussimghur ns, gn inn tafkka ns g jaj n ukungris allig rad nn ttuwmdal, aya d iga yan unsay (tradition) ur ar t lkkmnt ghas udmawn xatrnin g umzruy n Marikan, ur ittuwskar i kra ur igin 30 n uggidn (personnes) lli tt izwarn.
G abril 2008 ttuwskar yat tfugla g ukungris tzli s ukttay n 40 n isggasn zrinin xf tmttant n Martin Luther King, g usggas ann nit tlkn (se réaliser) twargit ns lli xf isawl g 1963, llig imurs Ubama g tfranin (élections) n Marikan ig aslway n Marikan ak. Ilmma iga 4 nwanbir 2008 yan wass mqqurn g umzruy n marikan llig munn middn ak, stin yan urgaz ad ig aslway n tmurt, min ad nn smaqqln s uklu ns (sa couleur) d uzur ns d usghan (religion) ns.
*S’est réalisée
Mohammed Akunad
http://www.akunad.com