ⴽⵓⴷ ⵏⴻⵜⵜⴰⵡⴹ ⵢⴰⵜ ⵜⵉⵣⵉ ⴰⵔ ⵏⵜⵜⵉⵖⵉⵍ ⵉⵙ ⵏⵉⵡⴹ ⴰⵛⴼⴼⴰⵍⵓ .ⵅⴰⵙ ⴰⴷ ⵜ ⵏⴻⵙⵙⵉⴳⴳ ⴰⵔ ⵏⵜⵜⴰⴼⴰ ⴰⴱⵔⵉⴷ ⵉⵙⵓⵍ ⵉⵖⵣⵣⵉⴼ ⴰⵀⴰ ⵢⵓⴳⵔ ⴷⵉⵙ ⵓⵙⴰⵡⵏ ⴰⴽⵯⵙⴰⵔ.ⴽⵓⴷ ⵏⴻⵜⵜⴻⴳⴰⴼⴰⵢ ⵏⵓⵊⵊⵓⵢ .ⴰⵎⵓⵙⵙⵓ ⵏⵏⴻⵖ ⵉⵔⴰ ⴽⵉⴳⴰⵏ ⵏ ⵓⵣⴻⴷⵎⵔ. ⵏⵏⴻⵄⵛⵓⵛⵎⵏ ⵉⵜⵙⵏ ⵉⵏⴻⵊⴷⴰ ⴰⵀⴰ ⵟⵟⴰⴼⵏ ⴰⵛⴰⵍ,ⵉⴷ ⵡⵉ-ⵢⵢⴰⴹ ⵙⵓⵍⵏ ⴷⴰ ⵙⴰⵍⴽⴰⵏ . ⵉⵜⵙⵏ ⴼⴼⴻⵖⵏ ⴰⴱⵔⵉⴷ ⵡⵉ-ⵢⵢⴰⴹ ⵛⴽⵓⴱⴱⵔⵏ .ⵉⵜⵙⵏ ⵛⵛⴻⴹⵏ ⴰⵀⴰ ⴳⵏⵓⴳⵉⵢⵏ ⵙ ⵉⵣⴷⴰⵔ , ⵉⴷ ⵡⵉ-ⵢⵢⴰⴹ ⵙⵓⵍⵏ ⴰⵔ ⵜⵜⴻⵎⵄⴰⴼⴰⵔⵏ. ⵉⵇⵇⴻⵏ ⵉⴼⴻⵙⵜⵉ ⵉⵜⵙⵏ ⵉⵎⴰⵡⵏ ⴷ ⵉⵜⵙⵏ ⵉⵎⵊⵊⴰⵏ. ⴰⵔ ⵜⵜⴻⴷⴷⵓⵏ ⵉⵏⴻⵊⴷⴰ ⴳ ⵉⴷⴻⵔⴱⴰ, ⵎⵣⴻⵍⵍⴰⵄⵏ.ⴽⵓ ⵢⴰⵏ ⵉⵎⴰⵏ ⴷ ⵓⵙⴰⵏⴼ ⵏⵏⴻⵙ.ⵛⵔⴰ ⴰⵔ ⵉⵙⵖⵓⵢⵢⵓ ⵜⴰⴼ ⴰⴷ ⴰⵙ ⵙⵙⴻⴼⵍⴷⵏ ⵡⵉ-ⵢⵢⴰⴹ ⵎⴰⵛⴰ ⵓⵔ ⵢⴰⴷ ⵜⴳⵉ ⵜⵖⵓⵢⵢⵉⵜ ⵏⵏⴻⵙ ⵅⴰⵙ ⴰⵎⵎ ⵜⵉ-ⵏ ⵓⵥⴻⵏⵥⵓⵎ ⴳ ⵉⵎⵊⵊⴰⵏ ⵏ ⵉⴹⴻⵕⴹⴰⵕ.ⵉⵊⵍⴰ ⴽⵓ ⵉⵏⵊⴷⵉ ⴰⴷⴻⵔⴱⵓ ⵏⵏⴻⵙ ⵉⵇⵇⵉⵎ ⴰⵔ ⵉⵜⵜⴻⵍⵍⵢ ⴳ ⵡⴰⵏⵙⴰ,ⴰⵔ ⵉⵙⵙⴰⵔⴰ ⴼ ⵓⵙⵜⵜⵉⴼ ⵜ ⵉⵙⵙⵓⴼⵓⵖⵏ ⵙ ⵓⴱⵔⵉⴷ ⴰⵟⴻⵎⵏⴰⵏ.ⴰⵔ ⵉⵔⴻⴳⴳⵯⴻⵍ ⵓⵙⵉⵔⵎ,ⵉⵛⵜⵎ ⵓⴱⴻⵢⵜⵍ ⵉⵍⵙⴰⵡⵏ.ⴰⵔ ⵜⵜⴻⵇⵇⴻⵍⵏ ⵉⵏⵊⴷⴰ ⴰⴷ ⵢⴰⵖ ⵛⵔⴰ ⵏ ⵓⵙⵉⴷⴷ ⵣⴻⴳ ⵡⴰⴼⵍⵍⴰ ⵜⴰⴼ ⴰⴷ ⴰⴼⵉⵏ ⴰⴱⵔⵉⴷ ⵜⴻⵏ ⵉⵙⵎⵓⵏ ⵙ ⴷⵉ-ⴷⴷⴰ ⵔⴰⵏ.ⵉⵎⵏⵉⵔⵏ ⵉⴳⴰⵏ ⵛⴰ ⴳⴻⵔ ⵜⴻⵄⵕⴰⴱⵜ ⴷ ⵜⵎⴰⵣⵉⵖⵜ ⵓⵔ ⴰⵔ ⵜⵜⴻⵎⵎⴰⵍⵏ ⵜⴰⵏⵉⵍⴰ ⴰⵙ ⵜⵜⵉⵢⵏ ⵓⴷⵎⴰⵡⵏ ⵏⵙⴻⵏ.ⵉⵜⵙⵏ ⴰⵔ ⵜⵔⴻⴱⴱⴰⵊⵏ ⴰⵡⴰⵍ , ⵓⵔ ⵙⵙⵉⵏⵏ ⵎⴰ ⵙ ⴷⴰ ⵏⴻⵣⵣⴻⵖⵏ, ⵡⵉ-ⵢⵢⴰⴹ ⴷⴰ ⵜⵜⵉⵖⵉⵍⵏ ⵉⵙ ⴰⵙⵏ ⵉⵖⵜⴰ ⵡⴰⵡⴰⵍ ⴰⵀⴰ ⵇⵇⴻⵏ ⵉⵎⵊⵊⴰⵏ ⵏⵙⴻⵏ. ⴰⵔ ⵉⵜⵜⴻⵊⴳⵓⴳⵓⵍ ⴽⵓ ⵢⴰⵏ ⴳⴻⵔ ⵓⵙⵉⵔⵎ ⴷ ⵓⴱⴻⵢⵜⵍ,ⴰⵙⵉⵔⵎ ⵏ ⵡⴰⴷ ⵉⵎⵢⴰⴼⴰ ⴷ ⵉⵙⵎⵓⵏⵏ ⵏ ⵓⵛⴱⴰⵕ ⵜⴻⵏ ⵉⵙⵎⴰⵏ ⴳ ⵢⴰⵏ ⵓⵖⴰⵔⴰⵙ ⵓⵣⴷⴷⵉⴳ ⴷ ⵓⴱⴻⵢⵜⵍ ⵏ ⵓⵣⴻⵎⵣⵟ ⵏⵏⴰ ⴳ ⵓⴼⴰⵏ ⵉⵖⴼⴰⵡⵏ ⵏⵙⴻⵏ. ⴰⵔ ⵉⵜⵜⴻⴷⴷⵓ ⴽⵓ ⵢⴰⵏ, ⴰⵔ ⵜ ⵉⴽⴽⴰⵜ ⵓⵔⴻⴼⵜⵉⵍ ,ⴰⵔ ⵉⵜⵜⴰⴼⴰ ⵛⵉⴳⴰⵏ ⵏ ⵜⴼⵉⵛⴰⵢ ⵏⵏⴰ ⵓⵔ ⵢⵓⴼⵉ ⴰⴷ ⵜⴻⵏ ⵉⵙⵙⵉⵜⵎ . ⴽⵓ ⵢⵓⴽ ⵉⵍⴽⵎ ⵜⵉⵣⵉ ⵏ ⵜⵉⵛⴽⴰ,ⵉⵇⵇⵉⵎ ⴰⵔ ⵉⵙⵙⵓⵜⵓⵍ ⵉ ⵓⴹⵖⴰⵕ ⵎⵖⴰⵕ ⴰⵔ ⵉⵜⵜⵉⵖⵉⵍ ⵉⵙ ⵉⴽⴽⴰ ⴰⵙⴰⴽⴰ ⵜ ⵉⵙⵙⵓⴼⵓⵖⵏ ⵣⵉ ⵜⴻⵙⵎⴰⵏⵏⴰⵟ.ⵜⴻⵖⵎⵙ ⵜⴻⵏ ⵜⴰⵍⵍⴻⵙⵜ ⵜⴰⵇⴻⵏⵛⴰⵔⵜ , ⴰⵔ ⵙⴻⴽⵙⵉⵡⵏ ⵙ ⵉⴳⵏⵏⴰ ⵎⴰⵔ ⵛⴰ ⵏ ⵡⴰⵢⵢⵓⵔ ⴰⵙⵏ ⵉⵜⵜⴻⵏⵄⴰⴷⵏ ⵜⴰⵏⵉⵍⴰ.ⴽⵓ ⵢⵓⴽ ⴰⵔ ⵉⵛⵕⵓⴱⴱⵓⵛ ⴳ ⵜⴰⵍⵍⴻⵙⵜ ⴰⵎⵎ ⵉⵙ ⴷⴰ ⵉⵛⵕⵓⴱⴱⵓⵛ ⴳ ⵉⵎⵣⴰⵣ ⵜⴰⴼ ⴰⴷ ⵉⵏⴹⵡ ⵜⴰⵍⵍⴻⵙⵜ ⵙ ⵓⵙⴰⵎⵎⵔ.ⵢⵓⵛⵢ ⴽⵓ ⵢⴰⵏ ⵉⵙ ⵢⵓⵛⴽⴰ ⵣⵉ ⴽⵓⴷ ⵉⵖⴰⵍ ⵉⵙ ⴰⵙ ⵉⵏⵎ ⵉⵍⵙ ⴰⵀⴰ ⵉⵖⵜⴰ ⴰⵙ ⵡⴰⵡⴰⵍ ⴷⴰⵢ ⵉⵇⵇⴻⵏ ⵉⵎⵊⵊⴰⵏ ⵏⵏⴻⵙ, ⵣⵉ ⴽⵓⴷ ⵉⵖⴰⵍ ⵉⴷ ⵅⴰⵙ ⵜⴰⴷⴰⵡⵜ ⵏⵏⴻⵙ ⴰⵢⴷ ⵉⵣⴹⴰⵕⵏ ⴰⴷ ⵜⵜⴰⵙⵢ ⴰⴳⴳⵯⴰ ⵏ ⵡⴰⵡⴰⵍ ⵉⵙⵜⵜⵓⵍⵏ, ⵣⵉ ⴽⵓⴷ ⵉⵖⴰⵍ ⵉⴷ ⵅⴰⵙ ⵏⴻⵜⵜⴰ ⴰⵢⴷ ⵉⴳⴰⵏ ⴰⴼⴰⴷⴰⴷ ⵉ ⵡⵉ-ⵢⵢⴰⴹ.ⵇⵇⵉⵎⴰⵏ ⵉⵏⵊⴷⴰ ⴰⵔ ⵜⵜⴻⵊⴳⵓⴳⵓⵍⵏ ⴳⴻⵔ ⵓⵙⵉⵔⵎ ⴷ ⵓⴱⴻⵢⵜⵍ ⵉⵎⵛⵉ- ⵏⵏⴰ ⴽⴽⴰⵏ ⴰⵔ ⵜⵜⴻⵊⴳⵓⴳⵓⵍⵏ ⴳⴻⵔ ⵉⵎⵉⵏⴳ ⴷ ⵓⵜⴰⵔⴰⵎ. ⵓⵔ ⵜⴰ ⵓⴼⵉⵏ ⵉⵖⴼⴰⵡⵏ ⵏⵙⴻⵏ ⵉⴷⴷⴻⵖ ⵓⵔ ⴳⵉⵏ ⵅⴰⵙ ⴰⵛⴰⴱⴰⵕ ⵏ
ⵉⵥⴻⵏⵥⵓⵎⵏ ⴷ ⵉⴹⴻⵕⴹⴰⵕ. ⴰⵖⴰⵣⴰⴼ ⵎⵓⵃⵎⵎⴰⴷ 22-10-2016/2966